Ҫӗрпӳ районӗнчи Каткасси ҫыннисем вара ял уявне питӗ илемлӗ вырӑнта — ҫӳллӗ хырсен хушшинче — ирттернӗ. Уява йӗркелес ӗҫе хӑй ҫине ҫак ялта хресчен ҫемйинче ҫуралнӑ Валентин Иванов илнӗ.

Малтанах уява пухӑннисене ял тӑрӑхӗн пуҫлӑхӗ Иван Данилов саламланӑ. Вӑл ҫак уява йӗркелекенсене уйрӑммӑн тав тунӑ.

Уява Шупашкартан та хӑна килнӗ. Каткассисене ЧР тава тивӗҫлӗ ӗҫченӗ, ЧР тава тивӗҫлӗ культура ӗҫченӗ Вячеслав Оринов саламланӑ.

«Кӑмӑл» пултарулӑх ушкӑнӗ ентешӗсене концертсемпе савӑнтарнӑ. Пӗр уяв та вӗсемсӗр иртмест. Халӑх Василий Степанов композиторӑн юррисене уйрӑмах кӑмӑлласа итленӗ.

Уява килнисем халӑх вӑййисене, спорт ӑмӑртӑвӗсене хутшӑнма пултарнӑ.

Утӑн 9-мӗшӗнче Вӑрмар районӗнчи Мӑнҫырма ялӗ уява пухӑннӑ. Вӗсен те ял кунне паллӑ тӑвасси йӑлана кӗнӗ.

Уяв «Ӗмӗт» фольклор ансамблӗ «Ай-хай улма йывӑҫҫи» юрӑ юрланипе пуҫланнӑ. Концерта вӗсем К.Иванов ҫулталӑкне тата Ҫӗнтерӳ 70 ҫул тултарнине халалланӑ. Яланхи пекех мӑнҫырмасене ял тӑрӑхӗн пуҫлӑхӗ В.Н.Семенов саламланӑ.

Общество ӗҫне хастар хутшӑннӑшӑн, чӑваш халӑх йӑли-йӗркине хисеплесе ӑна аталантарнӑшӑн вулавӑш заведующийне О.Ильинана, клуб заведующине Э.Кузнецовӑна, Л.Романова культйӗркелӳҫӗне грамотӑпа чысланӑ.

Мӑнҫырмасене саламламашкӑн сумлӑ хӑнасем ҫитнӗ. Вӗсем чи маттур та хастар ҫынсене тав ҫырӑвӗсемпе, парнесемпе чысланӑ.

Шупашкарти Вӑрмарсен ентешлӗхӗн президенчӗ Юрий Филиппов клуб заведующийне диск тата Мӑнҫырма ялӗн гимнӗн текстне парнеленӗ. Унтан Юрий Михайлович ял гимне пӗрремӗш хут юрланӑ.

Мӑнҫырмасен уявӗнче концерт пуян пулнӑ. Юрӑсем таврана тахҫанчченех янӑраттарнӑ…

Сӑнсем (53)

Питравра Хӗрлӗ Чутай районӗнчи Кивӗ Атикасси ял тӑрӑхӗнче те Питрав кунне ирттернӗ. Пӗчӗк Яманкасси ялӗнче пурӑнакансем япӑх ҫанталӑка пӑхмасӑрах пӗрле савӑннӑ.

Ентешӗсене ял тӑрӑхӗн пуҫлӑхӗ Юрий Чертов чунран саламланӑ. Уяв вырсарникуна лекнӗрен ҫынсем пухӑнкаланӑ. Питравра яманкассисем ял кунне паллӑ тунӑ.

Уявра вӗсем вӑйӑ картине тӑнӑ, юратнӑ юрӑсене итленӗ. Вӗсене «Шупуҫ» фольклор ушкӑнӗ шӑрантарнӑ.

Ял ҫыннисем валли вӑйӑсемпе конкурссем йӗркеленӗ. Ҫынсем михӗсемпе ӑмӑртса чупнӑ, вӗрен туртнӑ…

Хӑнасем пурте чӑваш шӳрпине ҫисе пӑхнӑ. Ӑна ҫавӑнтах пысӑк хуранта пӗҫернӗ. Уявра кашни килте тенӗ пекех пуян сӗтел хатӗрленӗ, тӑванӗсене хӑналанӑ.

Паян, Питравра, Йӗпреҫ районӗнчи Смычка тата Ирҫе Малиновки ялӗсем уява пухӑннӑ. Смычка клубӗ умне ватӑсем те, ачасем те пухӑннӑ.

Уява юнашар ялсенчи ҫынсем те килнӗ. Чи малтан ял тӑрӑхӗн пуҫлӑхӗ Сергей Карсаков тухса калаҫнӑ. Вӑл уява паллӑ тӑвасси йӑлана кӗнине палӑртнӑ, пурне те тулли кӑмалпа савӑнма ӑнӑҫу суннӑ.

Ял ҫыннисене район администрацийӗн пуҫлӑхӗ Николай Чугаров та килнӗ. Вӑл вара ҫынсене спорт мероприятийӗсенче ҫитӗнӳсем тума вӑй суннӑ. Николай Петрович Альбина Михетовӑна Йӗпреҫ районӗн грамотине панӑ.

Волейбол лапамӗнче тупӑшу хӗрӳ иртнӗ. Уяв вӗҫӗнче пурте сӗтел хушшине ларса шӳрпепе хӑналаннӑ.

Сӑнсем (13)

Ҫулла республикӑри ялсем хӑйсен уявне паллӑ тӑваҫҫӗ. Тӗрлӗ енне саланнӑ ентешсем ҫав кун пӗрле пухӑнса савӑнаҫҫӗ.

Хӗрлӗ Чутай районӗнчи Сорӑм ялӗнче пурӑнакансем та нумаях пулмасть пӗрле пуҫтарӑннӑ. Вӗсем ял уявне 2001 ҫултанпа уявлаҫҫӗ.

Утӑ уйӑхӗн 4-мӗшӗнче сорӑмсем ирех савӑнӑҫлӑ пулнӑ. Яла ҫав кун ҫӗнӗ варкӑш кӗнӗ тейӗн. Килсен умӗнче ватӑсем сак ҫинче ларнӑ, ҫамрӑккисем вӗсем патне пырса сывлӑхӗсемпе кӑсӑкланнӑ.

Сорӑмсем хӑнасене ял пуҫӗнче ҫӑкӑр-тӑварпа кӗтсе илнӗ. Унтан пурте яла пӑхса ҫаврӑнсан уяв лапамне ҫитнӗ те вӑйӑ картине тӑнӑ.

Атнар ял тӑрӑхӗн пуҫлӑхӗ Александр Кузнецов ентешӗсене ырӑ сӑмахсемпе саламланӑ, пурне те пӗрле кар тӑрса ӗҫленӗшӗн тав тунӑ.

Хисеплӗ хӑнасен йышӗнче Хӗрлӗ Чутай район пуҫлӑхӗ Александр Степанов та пулнӑ. Уявра хӑнасем, Сорӑма килнӗ ытти ҫынсем ял халӑхӗ пирки нумай ырӑ сӑмах каланӑ.

Сӑнсем (69)

Утӑ уйӑхӗн 4-мӗшӗнче, шӑматкун, Куславкка районӗнчи Тӗмшер ялӗнче уяв иртнӗ. Халӑх стадиона пухӑнса ял уявне пухӑннӑ.

Малтанах ентешӗсене Тӗмшер ял тӑрӑхӗн пуҫлӑхӗ Юрий Трофимов саламланӑ. Тӗмшерсене уявпа саламлама Куславкка район администрацийӗн пуҫлӑхӗ Валентин Колумб та ҫитнӗ. Вӑл Николай Романова, Галина Сергеевӑна, Маргарита Беловӑна общество ӗҫне хастар хутшӑннӑшӑн грамотӑсемпе чысланӑ.

Юрий Трофимов ял старостисене, общество ӗҫне хутшӑннисене, хастарсене Хисеп грамотисем панӑ. Паллах, уяв концертсӑр иртмен. Чӑваш эстрада артисчӗсем тӗмшерсене икӗ сехет савӑнтарнӑ.

Ачасем те спорт ӑмӑртӑвӗсенче вӑй виҫнӗ. Вӗсене пурне те пылак парнесемпе хавхалантарнӑ. Ял ҫыннисем конкурссене хастар хутшӑннӑ. Кире пуканӗ йӑтассинче Эдуард Краснова ҫитекенни пулман. Шашкӑлла выляса Владимир Ярцев ҫӗнтернӗ.

Ачасем валли вылямалли ятарлӑ лапам йӗркеленӗ. Унта шӑпӑрлансем аттракционсем ҫинче ярӑннӑ. Тӗмшерте мӗн тӗттӗмленичченех юрӑ-кӗвӗ янӑранӑ.

Сӑнсем (47)

Вӑрмар районӗнчи энтрияльсем ҫӗртме уйӑхӗн юлашки шӑматкунне ял уявне паллӑ тӑвассине йӑлана кӗртнӗ. Уява Энтрияльти культура ҫурчӗн культйӗркелӳҫи З.Н.Григорьева уҫнӑ. Унтан ял тӑрӑхӗн пуҫлӑхӗ И.А.Яковлев сӑмах илнӗ. Ун хыҫҫӑн ял старости тата ыттисем тухса калаҫнӑ.

Район администрацийӗнчен килнӗ Николай Павлов уяв йӗркелӳҫисене тав хучӗсемпе чысланӑ. Унтан спорт ӑмӑртӑвӗсем пуҫланнӑ. Чи маттуррисем 60, 200 метрсене чупса ӑмӑртнӑ. Кайран михӗре сикнӗ, кире пуканӗ йӑтнӑ.

Ӑмӑртусене ял халӑхӗ кӑна мар, тӳре-шара та хутшӑннӑ. Ҫӗнтерӳҫӗсене парнесемпе хавхалантарнӑ. Энтрияльсене саламламашкӑн чӑваш эстрада артисчӗсем те килнӗ.

Уява кашниех килте пӗҫӗрнӗ апат-ҫимӗҫ илсе килсе сӗтел ҫине лартнӑ.

Сӑнсем (118)

Муркаш районӗнчи Катькас халӑхӗ ял уявне 1989 ҫулта ирттерме пуҫланӑ. Кӑҫал ача-пӑчана савӑнма батут та пулнӑ. «Уява пухӑннӑ халӑх ӗлӗкхипе хальхи ял пурнӑҫне сӑнласа паракан тӗрлӗ стендсемпе паллашрӗ», — тесе пӗлтерет вӑл тӑрӑхри А. Угарова. Стендсене ял историйӗпе интересленекен Алексей Петров тата ялти культура ӗҫченӗсем хатӗрленӗ иккен.

Чӑваш йӑлине асра тытса уява ҫӑкӑр-тӑварпа пуҫланӑ. Ял халӑхне Алевтина Егоровӑпа Зоя Угарован килте вӗретнӗ сӑрипе сӑйланӑ. Уяв ячӗпе В.Н. Волкова ял депутачӗ, Чӑваш Наци конгресӗн пайташӗ Э.К. Бахмисов, республикӑри пенсионерсен пӗрлешӗвӗн ертӳҫи В.В. Сапожников саламланӑ.

Шкул ачисемпе пӗрле «Ҫӑлкуҫ» фольклор ушкӑнӗ Аслӑ Ҫӗнтерӗве халалласа «Тухас ҫук асӑмран нихҫан чӗрене кӗрсе юлнӑ суран» литературӑпа музыка композицийӗ хатӗрленӗ.

Ҫурлатӑрринчи культура ҫурчӗ ҫумӗнчи «Ҫеҫпӗл» эстрада ушкӑнӗн концертне те халӑх пӑхса савӑннӑ.

Сӑнсем (33)

Ҫӗртмен 13-мӗшӗнче Вӑрнар районӗнчи Мӑн Явӑшра ял кунӗ иртнӗ. Унта яланхи пекех ял тӑрӑхӗн пуҫлӑхӗ Андрей Васильев, «Мураты» ЯХПК тӗп директорӗ Геннадий Спиридонов хутшӑннӑ.

Йӑлана кӗнӗ тӑрӑх, хисеплӗ тата ватӑ ҫынсене тав ҫырӑвӗсемпе чысланӑ. Вӗсене Спиридонов Г.П., Спиридонов Ю.П., Спиридонова Ю.М., Яковлева М.Я., Романов А.Н., Прокопьева И.А., Алексеева Э.Н., Федоров А.Г., Петров С.И., Ивановой А.В., Сергеева М.М., Порфирьева А.М., Семенова З.С., Мартынова Р.С., Владимиров М.В., Владимирова З.С., Семенова А.М., Федорова Р.И., Порфирьева Р.А., Владимиров С.П. тивӗҫнӗ.

Унтан Мӑн Явӑш клубӗн ӗҫченӗсем концерт пуҫланӑ. Ҫавӑн пекех уява чӑваш эстрада артисчӗсем килнӗ.

Ҫав вӑхӑтра мини-футболла вылянӑ. Конкурс ҫӗнтерӳҫисене укҫан хавхалантарнӑ.

Сӑнсем (110)

Ҫӗртмен 6-мӗшӗнче Муркаш районӗнче Очӑкасси ялӗ хӑйӗн 420 ҫулне шавлӑн та анлӑн уявларӗ.

Ял уявӗ пуҫламӑшӗ пултаруллӑх коллективӗсем урам тӑрӑх утса тухнинчен пуҫланчӗ, кайран яла пуҫаракансем Очӑпа Очак пӗрремӗш ҫурт пулмалли вырӑнта шалча ҫапрӗҫ, хӳшӗ лартрӗҫ. Ял хастарӗсем вара асӑнмаллах юпа вырнаҫтарчӗҫ тата Очӑкасси ялне тата ун ҫыннисене асӑннӑ истори докуменчесенчи цитатӑсем ҫырнӑ грамота евӗр палӑка уҫрӗҫ.

Малалла уяв пултаруллӑх ушкӑнӗсен концерчӗпе тӑсӑлчӗ.

Сӑнсем (40)